Di kerasnye kehidupan pinggiran Betawi, ada bocah tengil bernama Jambul yang mulutnye ceplas-ceplos tapi nyalinya kagak kalah sama jagoan gede. Bareng gurunye yang nyentrik, si Babeh Kribo, Jambul belajar silat, akal-akalan, sampe cara bertahan idup di dunia yang penuh tipu daya.
Dari satu masalah ke masalah lain, Jambul sering kejebak urusan sama rampok, buronan, sampe rahasia gelap yang ngumpet di balik hutan dan kampung. Tapi dengan gaya santai, tingkah kocak, dan kemampuan yang makin hari makin jadi, dia pelan-pelan ngebuktiin kalo dirinya bukan bocah sembarangan.
Penuh tawa, bahaya, dan ambisi, perjalanan si Jambul jadi kisah seru tentang keberanian, kecerdikan, dan mimpi besar… walau kadang dimulai cuma dari niat sederhana: nyari duit sama petualangan.
Karya ini diterbitkan atas izin NovelToon Bang Jigur, isi konten hanyalah pandangan pribadi pembuatnya, tidak mewakili NovelToon sendiri
Ke markas van de brenk bag 2
Lama-kelamaan mata si Mat Kodir makin jelas. Pandangannye mulai fokus, terus langsung ngeliat sosok aneh di depannye. Matanye belo, rambutnye putih kribo, kulitnye keriput, mulutnye agak manyun dikit.
“Huwaaaa… pasti lu penghuni alam barzah! Oh ya Tuhan, aye masih banyak dosa. Balikin aye ke dunia! Ampun, Tuhan!” ucap si Mat Kodir tanpa malu-malu, panik setengah mati.
“Dah mati aje lu baru mau tobat. Percuma tobat lo! Dah berape keluarga yang lu rampok, yang lu rusak anak gadisnye, hah? Tanah aje ogah nerima bangke kayak lu. Pantesnye emang lu masuk neraka bedua!” gentak si Babeh, suaranye berat dan dingin.
Tapi pas Mat Kodir ngeliat sekeliling, ngerasain tangannye diiket, barulah dia sadar… dia masih di dunia.
“Heh bangsat! Lepasin gua! Siape lu, hah?!” bentak balik si Mat Kodir, mulai berani lagi.
Si Babeh makin mendekat, mukanye dideketin ke muka si Mat Kodir.
“Lu tegesin nih muka gua. Pasti lu inget,” ucapnya pelan, tapi nadanye tajem.
Mat Kodir merhatiin lagi wajah si Babeh Kribo. Ingatannye muter. Dari omongan komplotannye, dia pernah denger… ada pesilat Betawi yang suka ngerampok para perampok.
Dan seketika itu juga dia sadar.
“Jadi… lu yang namanye Setan Kribo? Bajingan! Kelakuan lu sama aje, tukang rampok tua bangsat!” bentak si Mat Kodir.
Geplaaakk!
Kepalanye langsung kena geplak lagi sama si Babeh sampe puyeng.
“Sembarangan lu kalo ngomong! Kagak ada salahnye ngerampok para perampok. Toh duit mereka haram juga. Nah sekarang… kasih tau, di mane komplotan lu berada,” tanya si Babeh, matanye nyorot tajem.
“Cuihh! Kagak sudi gua ngasih tau, tua bangka! Mending lu mati aje!” balas si Mat Kodir, ludahnya nyembur ke tanah, mukanye penuh benci.
“Wah, emang lu udah bosen idup ye. Lu barusan dah ngirup aroma ‘seger’ dari dubur gua, kan? Nah, siap-siap deh… ini gua keluarin yang level dua,” ucap si Babeh santai, tapi nadanye nyeremin.
Denger begitu, si Jambul langsung mundur makin jauh. Dia udah apal, kalo level satu aje udah bikin mual setengah mati, apalagi level dua.
Si Babeh maju dikit… terus dipantatin lagi tuh muka dua rampok.
Jebrooooooollll!
Suara menggema di pinggir hutan. Hembusan anginnye sampe bikin badan dua rampok itu kehempas, kepala mereka kebanting ke belakang, terus—
Buaghh!
Kepalanye nabrak batang pohon.
“Hegghhh… hoekkk… hoekkk… heghhh…!”
Kali ini bukan cuma daun yang layu. Daun-daun sama ilalang di sekitar langsung rontok, kayak disapu angin maut.
Muka dua rampok itu udah kagak karuan. Pucat, mata berair, urat leher tegang nahan bau yang kayak neraka kebuka. Napas mereka kacau, badan gemeteran.
Sampai akhirnya—
“Hoekk!!”
Mereka muntah, bahkan sampe keluar darah.
Itu baru Ajian Semar Mendem level dua… belom nyampe level tiga.
“Hoekk… ampuuun, ampuuun! Jangan kentut lagi kek! Dah mau mati gua nyiumnya… hoekkk!” ucap si Mat Kodir, kali ini bener-bener kapok, mukanye pucet ketakutan.
Sementara itu si Jambul yang udah menjauh sampe ngerahin tenaga dalem, nahan napas, biar “harum” maut dari si Babeh kagak masuk ke paru-parunye.
“Bagus… dah kapok lu, hah? Nah, di mane sarang komplotan lu? Cepet bilang!” gentak si Babeh, nadanye tegas.
“Ga terlalu jauh dari sini, kek… di dalem hutan, deket aer terjun… ada perkemahan di sono…” jawab si Mat Kodir terbata-bata, suaranye lemes, masih sisa-sisa mual.
