Di kerasnye kehidupan pinggiran Betawi, ada bocah tengil bernama Jambul yang mulutnye ceplas-ceplos tapi nyalinya kagak kalah sama jagoan gede. Bareng gurunye yang nyentrik, si Babeh Kribo, Jambul belajar silat, akal-akalan, sampe cara bertahan idup di dunia yang penuh tipu daya.
Dari satu masalah ke masalah lain, Jambul sering kejebak urusan sama rampok, buronan, sampe rahasia gelap yang ngumpet di balik hutan dan kampung. Tapi dengan gaya santai, tingkah kocak, dan kemampuan yang makin hari makin jadi, dia pelan-pelan ngebuktiin kalo dirinya bukan bocah sembarangan.
Penuh tawa, bahaya, dan ambisi, perjalanan si Jambul jadi kisah seru tentang keberanian, kecerdikan, dan mimpi besar… walau kadang dimulai cuma dari niat sederhana: nyari duit sama petualangan.
Karya ini diterbitkan atas izin NovelToon Bang Jigur, isi konten hanyalah pandangan pribadi pembuatnya, tidak mewakili NovelToon sendiri
Mpok dian di culik
Sementare itu, di kebon belakang Pasar Kramat Jati, hawa panasnye bukan maen. Di situ berdiri beberapa komplek bangunan yang udah pasti jadi markasnye Bang Jokan. Bangunannye dibuat melingkar, dan tepat di tengah-tengahnye ada lapangan kecil yang dipake buat nyimpen alat-alat penyiksaan.
Di tengah lapangan ntu, Mpok Dian diiket di sebuah tonggak kayu. Keadaannye bener-bener ngenes. Tubuhnye penuh luka goresan, bajunye juga udah sobek di mane-mane, hasil kebejatan Bang Jokan yang kaga punya peri kemanusiaan. Dari tadi Bang Jokan kaga brenti-brentinye nanyain soal di mane markas si Setan Kribo.
"Lo udah gila ya! Sampe kayak begini keadaannye, lo masih berani tutup mulut?! Kalo lo masih diem aje, besok anak buah gua bakal merkosa lo rame-rame! Mending lo kasih tahu sekarang, di mane mereka?!" gertak Bang Jokan sambil nyengkrem kenceng dagu Mpok Dian, maksa biar mata perempuan ntu natap die.
Mpok Dian yang napasnye udah senin-kemis tetep kaga mau nyerah. Dia natap Bang Jokan pake tatapan benci yang dalem bener.
"Gua udah bilang... gua kaga tahu! Kalo pun gua tahu, gua kaga sudi kasih tahu setan kayak lo! Jangan ngimpi lo bise rebut Ipeh dari mereka! Cuihhh!" bales Mpok Dian sambil ngumpulin sisa tenaga buat ngeludahin tepat di muke Bang Jokan.
Muke Bang Jokan langsung merah padam kena ludah. Dia ngusap mukenye pake punggung tangan sambil nahan amarah yang udah mau meledak. Suasana di lapangan ntu makin tegang, anak buah Bang Jokan yang laen cuma bise nunduk, kaga berani liat bosnye lagi dihina begitu.
Dua hari lalu emang si Jokan mutusin buat nyulik Mpok Dian. Semue gara-gara si Iwan yang kerjanye cuma ngerengek mulu penget cepet kawin ama si Ipeh. Mau kaga mau, Jokan nyulik Mpok Dian buat nyari keterangan di mane rimbanye si bocah. Tapi masalahnye, emang Mpok Dian kaga tahu ape-ape.
Si Jokan sebenernye udah mulai bosen nyiksa Mpok Dian. Tapi masalahnye bakal makin gede. Kalo sampe besok ini mpok-mpok tetep kaga buka mulut, kehormatannye bakal dibikin kotor sekotor-kotornye.
Plakkkk!
Mpok Dian kena gampar Jokan sampe kepalanye nengok ke samping.
"Kampret lo! Berani bener pake ngeludahin gua! Heh, dengerin ya, kalo lo masih batu juga, gua kaga bise lagi nahan anak buah gua. Besok kehormatan lo bakal terkoyak!" bentak Jokan sambil matanye melotot sangar.
Abis ntu, si Jokan langsung ngacir ninggalin lapangan. Dia yakin kaga lama lagi si Setan Kribo bakal nyamperin rumah Mpok Dian, terus nyusul kemari. Tapi emang itu yang dia tunggu-tunggu. Di dalem markas, Mat Gondrong udah siap siaga bareng puluhan anak buahnye. Ditambah anak buah si Jokan yang bejibun, jelas makin sesek dah itu markas.
Kalo Setan Kribo berani nongol kemari, dia bakalan kejebak mentah-mentah. Soalnye, Mat Gondrong emang lagi sembunyi di ruangan rahasia yang udah ditentuin, tinggal nunggu waktu yang pas buat nerkam.
Bang Jokan emang langsung menuju ke ruangan rahasia ntu, tempat di mane Mat Gondrong lagi asyik nyantai ngopi bareng anak buahnye. Di situ keliatan juga si Jalu yang ikut nangkring. Seabis mereka ngadep Van de Brenk, Mat Gondrong emang dapet tugas khusus buat nangkep Setan Kribo hidup-hidup.
Bukannye ape-ape, harta yang digondol Setan Kribo dari markas almarhum Mat Kodir—yang mati konyol kecemplung lobang tai ntu—banyaknye kaga ketulungan. Pas Mat Gondrong balik ke kampungnye di Sawangan, dia dapet laporan lengkap dari anak buahnye. Inilah yang bikin jala buat nangkep Setan Kribo makin mulus.
"Gimane? Tuh cewe mau buka mulut kaga?" tanya Mat Gondrong sambil nyeruput kopi paitnye pelan.
"Kayaknye emang kaga tahu ape-ape dia, Bang. Udah cape gua nyiksanye, tetep aje jawabannye kaga tahu di mane tempatnye si Setan Kribo," jawab Bang Jokan sambil narik kursi, mukanye keliatan sepet.
Mat Gondrong diem bentar, matanye yang cuma satu ntu natap asep kopi yang ngebul.
"Hmmh... kalo gitu kite tungguin aje dia dateng. Gua yakin kaga lama lagi Setan Kribo bakalan nyamperin kemari," ucap Mat Gondrong mantap.
Suasana di ruangan ntu jadi makin dingin. Si Jalu yang denger omongan ntu cuma bise diem sambil ngelus goloknye, udah kaga sabar pengen ngebuktiin kalo dia bise ngeberesin urusan ini demi dapet pujian dari Van de Brenk.
Kembali ke markas Babeh Kribo. Udah hampir empat bulan si Ipeh sama Jambul diperes keringetnye lewat latihan yang kaga kenal ampun. Babeh bener-bener pengen mereka siap lahir batin buat ngadepin idup yang makin keras dan kejem. Segala macem jurus rahasia dikeluarin, segala macem tenaga dalem ditingkatin sampe ulu hati.
Hasilnye emang kaga bohong. Kelincahan Ipeh ama Jambul sekarang udah tipis bedanye, hampir kaga bise dibedain kecepatannye. Cuma gaya maennye aje yang beda. Jurus-jurus Jambul keliatan banget gaya Betawi tulennye—ganas, cepet, dan tepat nyasar ke titik lemah lawan. Sementare si Ipeh, gerakannye keliatan lemah gemulai kayak nari, tapi sebenernye mematikan bener berkat gabungan Kungfu ama pedang Wushunye.
Akhirnye, Babeh ngerasa udah cukup buat sekarang. Kemampuan Jambul ama Ipeh udah kaga bise lagi dianggap remeh, malah udah pantes dibilang jawara muda.
Babeh berdiri di depan mereka, mukenye serius, kaga ada becandanye acan.
"Dengerin baek-baek! Babeh ngajarin kalian silat bukannye buat gaya-gayaan atau pamer otot, tapi buat jaga diri ama belain yang bener. Ilmu kalian emang udah berkembang pesat, tapi jangan sampe bikin lu pada jadi sombong. Inget, di atas langit masih ada langit lagi! Dan yang paling penting, iman kalian kaga boleh geser sedikit pun sama Tuhan yang Maha Kuasa. Berkat Dia kalian bise jadi jago begini. Jadi, jangan jadi jagoan yang keblinger, jadilah jagoan yang bawa manfaat buat masyarakat sekitar. Lu pada paham?!" ucap Babeh, suaranye ngebass ampe kedengeran ke sela-sela goa.
"Paham, Beh!" bales Ipeh ama Jambul barengan, mantap bener kedengerannye.
