Di kerasnye kehidupan pinggiran Betawi, ada bocah tengil bernama Jambul yang mulutnye ceplas-ceplos tapi nyalinya kagak kalah sama jagoan gede. Bareng gurunye yang nyentrik, si Babeh Kribo, Jambul belajar silat, akal-akalan, sampe cara bertahan idup di dunia yang penuh tipu daya.
Dari satu masalah ke masalah lain, Jambul sering kejebak urusan sama rampok, buronan, sampe rahasia gelap yang ngumpet di balik hutan dan kampung. Tapi dengan gaya santai, tingkah kocak, dan kemampuan yang makin hari makin jadi, dia pelan-pelan ngebuktiin kalo dirinya bukan bocah sembarangan.
Penuh tawa, bahaya, dan ambisi, perjalanan si Jambul jadi kisah seru tentang keberanian, kecerdikan, dan mimpi besar… walau kadang dimulai cuma dari niat sederhana: nyari duit sama petualangan.
Karya ini diterbitkan atas izin NovelToon Bang Jigur, isi konten hanyalah pandangan pribadi pembuatnya, tidak mewakili NovelToon sendiri
Si jambul vs dua buronan bag 3
Sementara si Babeh cuma nonton aje dari balik batu sambil ngunyah buah sawo, santai banget kayak lagi nonton lenong.
“Mayan, Mbul… tapi gerakan lu masih kurang cepet. Seharusnye lu kagak usah kebanyakan ngindar. Langsung babat aje,” gumam si Babeh pelan, matanye tetep mantengin pertarungan.
Liat temennye nyusruk nyium tanah, si Mat Kodir makin yakin nih bocah bukan sembarang bocah. Tatapannye berubah, lebih waspada, lebih serius.
Sringgg!
Dia juga langsung ngeluarin goloknye. Kilatannya tipis, tapi auranye bahaya.
“Heh bocah laknat! Siape sebenernye lu, hah? Dari mane lu tau kite buronan?” gentak si Mat Kodir, suaranye berat penuh ancaman.
“Gambar muka lu udah kesebar di seantero Condet, ye. Jadi gampang aje ngenalin lu berdua,” jawab si Jambul santai, masih dengan gaya nyablaknya.
“Terus maksud lu mau nangkep kite berdua gitu? Ngimpi lu, bocah tengil!” bentak si Mat Kodir, mukanye makin merah nahan emosi.
Tanpa nunggu lagi, dia langsung lompat.
“Heeeyaaa! Mampus lu!”
Kali ini Mat Kodir bener-bener kagak main-main. Goloknye langsung nyerang si Jambul bertubi-tubi, ganas dan cepet.
Wass! Wuss! Wusss!
Golok itu ngebabat ke sana kemari, nyerang dari berbagai arah, nyari celah buat ngehantam. Tapi si Jambul udah siap. Dengan lincahnye dia melompat, bergeser, nunduk, bahkan muter badan. Semua babatan golok Mat Kodir cuma nyapu angin doang.
“Ni bocah lincah amat kayak kijang… masa gua kalah sama bocah? Sialan!” gerendeng si Mat Kodir dalem hati, makin kesel.
Ngerasa serangannye belom cukup, Mat Kodir ningkatin lagi kecepatan sama tenaganye. Kali ini bukan cuma tebasan golok, hembusan angin dari sabetannye aja udah mulai kerasa nyabet kulit si Jambul.
Sementara itu, dari balik batu…
“Dableg bener nih si Jambul. Terlalu ngeremehin lawan. Ngindar mulu… udah hajar aje langsung. Kelamaan lu,” gerendeng si Babeh dalem hati, tetep santai sambil ngunyah buah sawo, matanye kagak lepas dari pertarungan.
Dalam satu serangan, si Mat Kodir merangsek maju sambil ngebabat goloknye bersilang ke depan, niatnye jelas mau nyabet badan si Jambul.
Jambul sigap. Dia langsung salto ke belakang beberapa kali. Sabetan golok terus melesat di depan badannye, nyaris nyenggol tiap gerakan. Tapi di salto ketiga, pas badannye lagi merendah di bawah, tiba-tiba kakinye melesat cepat, ngarah ke kaki si Mat Kodir.
Karena masih sibuk nyabet di atas, Mat Kodir kagak sempet lagi ngegeser kakinye.
Duk!
Kakinye kena sapuan telak.
Serangan dadakan itu bikin Mat Kodir langsung kepelanting ke atas, posisinye persis di atas Jambul.
Jambul kagak nyia-nyiain kesempatan. Dari bawah, badannye muter, lalu langsung ngelontarin tendangan ke arah perut.
Buaaaghh!
“Hegggghh…!” napas si Mat Kodir keambil.
Bukannye jatoh, badannye malah mental makin ke atas. Pas mulai turun nukik ke bawah, Jambul langsung berguling ke samping, ngasih ruang.
Brugggg!
Tubuh si Mat Kodir telak ngebentur tanah. Diam… kagak gerak lagi. Kayaknya pingsan.
Kali ini si Jalu yang udah bangun mulai sadar. Ternyata emang nih bocah bukan sembarang bocah. Dalam beberapa jurus aje, si Mat Kodir udah tumbang. Apalagi dirinye.
“Gua harus kabur nih. Apes bener ketemu bocah laknat,” keluhnye dalem hati, keringet dingin mulai ngucur.
Tanpa pikir panjang, si Jalu langsung ngeluarin jurus langkah kaki seribu. Kakinye ngebut, badan nye nyelonong kayak dikejar setan.
Ngeliat itu, si Jambul kagak mau kalah. Dia langsung nyengir tipis.
“Wih… mau kabur lu?”
Dalam sekejap, dia keluarin jurus langkah kaki sepuluh ribu. Gerakannye jauh lebih cepet, angin sampe kesibak pas dia melesat.
Wussss!
Dalam hitungan detik, dia udah nyusul di samping si Jalu.
“Lu mau ke mane, Bang?” tanya si Jambul santai, padahal lagi lari kenceng.
Karuan aje si Jalu kaget setengah mati.
“Gila lo! Kecil-kecil cepet juga ngibritnye. Gua mau kabur, Cil!” balesnye sambil tetep maksa lari.
“Kagak bisa, Bang. Lu mau lari ke mane juga, gua kejar… hehe,” kelakar si Jambul, masih santai sambil lari sejajar.
“Oh gitu… kagak bisa ye? Ya udah kalo gitu terserah lu deh, Cil. Gua pasrah aje…”
Belom juga kalimatnye kelar—
Buaghh!
Si Jambul langsung nabrak badan si Jalu dari samping dengan keras.
Badan si Jalu kepental, melayang, terus—
Gabrukkk!
Nubruk batang pohon dengan suara keras, lalu jatoh nyusruk ke tanah.
Diam… kagak gerak lagi. Kayaknye nasibnye sama kayak si Mat Kodir.
![Eternal Memory [ Ingatan Abadi ]](https://cn-e-pic-aliyun.mangatoon.mobi/cartoon-posters/6012483ef6e.webp-posterup6)
