Di kerasnye kehidupan pinggiran Betawi, ada bocah tengil bernama Jambul yang mulutnye ceplas-ceplos tapi nyalinya kagak kalah sama jagoan gede. Bareng gurunye yang nyentrik, si Babeh Kribo, Jambul belajar silat, akal-akalan, sampe cara bertahan idup di dunia yang penuh tipu daya.
Dari satu masalah ke masalah lain, Jambul sering kejebak urusan sama rampok, buronan, sampe rahasia gelap yang ngumpet di balik hutan dan kampung. Tapi dengan gaya santai, tingkah kocak, dan kemampuan yang makin hari makin jadi, dia pelan-pelan ngebuktiin kalo dirinya bukan bocah sembarangan.
Penuh tawa, bahaya, dan ambisi, perjalanan si Jambul jadi kisah seru tentang keberanian, kecerdikan, dan mimpi besar… walau kadang dimulai cuma dari niat sederhana: nyari duit sama petualangan.
Karya ini diterbitkan atas izin NovelToon Bang Jigur, isi konten hanyalah pandangan pribadi pembuatnya, tidak mewakili NovelToon sendiri
Ke markas van de brenk.
Si Babeh keluar dari tempat sembunyi, langkahnya santai. Matanye langsung melototin si Jambul dari ujung kepala sampe kaki.
“Kelamaan lu. Beresin dua cecunguk gini doang lama amat,” ledek si Babeh, nada nye nyeletuk tapi nyelekit.
“Dih, si Babeh bukannya muji kek. Dah hampir mati tadi, Beh. Aye kesamber golok. Untung aje aye cepet. Bat bet kelar dah nih duo laknat,” ucap si Jambul sambil meragain jurus silat, gaya banget.
“Gaya lu. Kalo gua mah lebih cepet lagi. Lu terlalu perhitungan, Mbul. Seharusnye dari awal lu udah bisa nakar kemampuan lawan,” bales si Babeh sambil geleng-geleng. “Udah, kumpulin tuh iket. Nunggu mereka pada sadar. Abis itu kite tanyain di mane markasnye.”
“Lah, Beh… bukannye kite mau bawa nih orang berdua ke markas Van de Brenk?” tanya si Jambul, keningnye berkerut.
“Yah, maklum sih lu masih bocil. Pikiran lu masih cetek,” jawab si Babeh santai, nyengir dikit. “Emang ntar kite bawa ke markas tuh menir. Tapi kalo kite udah tau sarang kelompoknye nih dua laknat… kite bukan cuma dapet seratus gulden dari Van de Brenk. Kite juga bisa ngincer sarangnye si Mat Kodir, yang gua yakin nyimpen harta banyak… hehe.”
Denger itu, mata si Jambul langsung ijo. Kebayang di kepalanye tumpukan perhiasan, emas, sama duit berkilauan di sarang si Mat Kodir. Senyumnya langsung melebar, penuh khayalan duit.
“Denger harta karun aje… ngiler lu, botak,” ledek si Babeh sambil nyengir.
Khayalan si Jambul langsung buyar seketika.
“Ah, Babeh ganggu aje. Aye lagi ngebayangin makan kebo goreng sama sate buaye, Beh… hehe,” bales si Jambul, masih cengengesan.
“Gua gaplok sini lu, ngomong sate buaye hah?” ancem si Babeh, tangan udah siap melayang.
“Yee… bukan buaye piaraan Babeh. Maksud aye yang biasa dijual di daerah Pondok Cina, Beh. Pan kite mau ke sono kan?” bales si Jambul buru-buru, ngeles.
“Iye, ntar kite ketemu Menir Van de Brenk di sono. Anak buahnye tuan tanah Cornelius Chastelein. Nah, sekarang kite bangunin dulu nih dua orang,” ujar si Babeh sambil nyuruh.
Setelah diiket kuat sama si Jambul, tuh dua rampok disenderin di pohon. Si Babeh maju dikit, terus mantatin muka keduanye dengan santai.
Ga lama…
Jebroootttt!
Gas beracun keluar dari dubur si Babeh. Baunye naujubileh, nyengat sampe bikin mata perih. Daun-daun di sekitar langsung layu seketika, kayak kena kutukan.
Si Jambul langsung kaget, kagak nahan, buru-buru menjauh sambil nutup hidung.
“Hoekkk! Neh… aye kagak nyangka, Beh! Begitu amat cara banguninnye. Ngomong dulu kek! Mana bau bangke pula… hoekkk… pluk… cuihh!” geram si Jambul sambil megap-megap, mukanye udah ijo pucet nahan mual.
“Yah, itu baru level satu Ajian Semar Mendem, lu udah mau muntah. Gimana kalo gua keluarin yang level tiga?” ucap si Babeh nantangin, matanye nyipit jail.
Seketika muka si Jambul langsung pucet kagak karuan.
“Eh, ja-jangan, Beh… udah cukup! Level tiga, aye yakin pohon-pohon pada tumbang, Beh,” bales si Jambul buru-buru, sambil mundur setapak.
Ga lama, tuh dua rampok mulai kebangun gara-gara ngirup “senjata pamungkas” si Babeh. Bulu idungnye langsung pada kriting, mukanye berkerut nahan bau.
“Hoekk… hoekkk… nih gua udah di alam barzah kali ye… baunye begini amat? Mirip bangke sapi dicampur menyan…” keluh si Mat Kodir yang baru sadar, suaranye serak.
Di sampingnye, si Jalu juga udah “hoek… hoek…” kagak berhenti, mukanye ijo.
Sementara itu, si Jambul nahan ketawa, cengar-cengir liatin dua orang itu sengsara.
Plakk!
Kepala si Mat Kodir langsung kena keplak sama si Babeh.
“Adehhh! Heh, sialan! Siape yang ngeplak gua?” ucap si Mat Kodir sambil ngucek mata, penglihatannye masih burem.
