Di kerasnye kehidupan pinggiran Betawi, ada bocah tengil bernama Jambul yang mulutnye ceplas-ceplos tapi nyalinya kagak kalah sama jagoan gede. Bareng gurunye yang nyentrik, si Babeh Kribo, Jambul belajar silat, akal-akalan, sampe cara bertahan idup di dunia yang penuh tipu daya.
Dari satu masalah ke masalah lain, Jambul sering kejebak urusan sama rampok, buronan, sampe rahasia gelap yang ngumpet di balik hutan dan kampung. Tapi dengan gaya santai, tingkah kocak, dan kemampuan yang makin hari makin jadi, dia pelan-pelan ngebuktiin kalo dirinya bukan bocah sembarangan.
Penuh tawa, bahaya, dan ambisi, perjalanan si Jambul jadi kisah seru tentang keberanian, kecerdikan, dan mimpi besar… walau kadang dimulai cuma dari niat sederhana: nyari duit sama petualangan.
Karya ini diterbitkan atas izin NovelToon Bang Jigur, isi konten hanyalah pandangan pribadi pembuatnya, tidak mewakili NovelToon sendiri
Si jambul vs dua buronan bag 2
Dengan pedenye si Jambul ngelangkahin kaki. Dadanye dibusungin, pipinye digembungin, mukanye disangar-sangarin kayak jagoan kampung. Pas nyampe depan Mat Kodir, tangannye disilangin ke dada. Tapi diem aje, kagak ngomong apa-apa. Cuma nyetor tampang sangar doang.
Karuan aje Mat Kodir sama si Jalu jadi planga-plongo, keheranan liat tingkah tu bocah.
“Napa nih bocah? Kesambet kali ye?” tanya si Jalu sambil nengok ke Mat Kodir.
“Tau nih, tuyul nyasar siang-siang. Kurang sajen kali,” bales Mat Kodir sambil nyengir sinis.
“Heh bocah! Lu ngapain ngalangin jalan orang? Minggir luh!” bentak si Mat Kodir, nadanye mulai kasar.
“Boleh… tapi cepe dulu,” pinta si Jambul santai, sambil nadahin tangan kanannye, mukanye masih sok galak.
Mat Kodir makin senewen. Ketemu bocah tengil di tengah panas begini aja udah bikin emosi, apalagi malah dipalakin.
“Wah, nih bocah cari mati. Eh, mending lu pulang dah ye. Sana, nenen sama mak lu. Minggir!” seru si Mat Kodir, udah setengah naik pitam.
“Kaga bisa. Nih daerah gua. Lu lewat tempat gua, ada pajaknye. Kagak bisa sembarang lewat. Cepe dulu… gulden ye, bukan perak,” jawab si Jambul santai, tangannye masih nengadah, mukanye tetep songong.
Makin emosi aje dah si Mat Kodir. Die mah kagak peduli bocah ape orang gede. Kalo ganggu, pasti dibabat tanpa ampun.
“Kampret nih bocah ngehe… bener-bener nantangin maut lu ye!” geramnya, urat lehernya sampe keliatan.
Wussss!
Kaki si Mat Kodir langsung melayang dari samping. Gerakannye cepet banget, jelas niatnye mau ngancurin pala si Jambul sekali hajar.
Tapi dengan santainye, si Jambul cuma geser kebelakang dikit aje. Sepakan maut itu lewat persis di depan mukanye, nyisir tipis banget.
Akhirnye, tuh sepakan si Mat Kodir cuma nyepak angin doang.
Mat Kodir langsung terkejut. Matanye melebar, kagak nyangka bocah sekecil itu bisa ngindarin sepakan kakinye yang seganas itu.
Merasa direndahin sama bocah ingusan, si Mat Kodir langsung naik pitam. Tanpa banyak bacot, dia babat pake tinju lurus ke depan, tenaga penuh, niatnye jelas mau ngehajar sekali jadi.
Wusss!
Lagi-lagi si Jambul dengan santainya cuma geser dikit ke kiri. Tinju itu nyamber di samping kupingnye, lewat tipis banget, tapi tetep kagak kena.
“Udah deh… mending lu berdua nyerah aje. Kalo kagak punya duit, ya gua bawa ke Menir Van de Brenk. Mayan, pala lu berdua dihargain seratus gulden… hehe,” ucap si Jambul santai, malah cengengesan, seolah lagi nawarin dagangan, bukan nantangin maut.
“Buset, nih bocah tau kite buronan, Dir. Masa lu kagak bisa ngalahin tuh bocah sendirian sih?” ledek si Jalu sambil nyengir.
“Diem lu! Gua rasa nih bocah bukan sembarang bocah dah. Dua kali serangan maut gua dielakin dengan gampangnye,” bales si Mat Kodir, nadanye mulai serius.
“Ah, lu aje yang payah. Lawan bocah aje kagak kena-kena,” ledek si Jalu lagi, makin nyulut emosi.
“Heh bocah kampret… sori nih ye. Karena lu udah tau tentang kite berdua, terpaksa lu kudu mati!”
Sringgg!
Si Jalu langsung ngeluarin goloknye, kilatannya nyamber kena cahaya. Tanpa nunggu lama, dia langsung nyerang si Jambul, ngebabat dari arah samping, bidik leher.
Tapi kali ini si Jambul kagak ngindar. Dia malah maju cepet ke depan, motong jarak sebelum sabetan golok nyampe.
Bug!
Tinju si Jambul langsung ngehantam tangan si Jalu yang lagi ngelayang.
“Arghhh!” si Jalu mengaduh kesakitan. Goloknye langsung kepental dari genggaman.
Belom sempet ngumpulin fokus lagi, si Jalu udah keburu kena serangan lanjutan. Si Jambul muter badan dengan lincah, kakinye langsung melayang, ngarah ke dada.
Buaghhh!
Tendangan muter itu telak banget ngehantam dada si Jalu. Karena lagi goyah, kagak siap, badan si Jalu langsung kepental.
Karuan aje, dia mental jauh ke belakang, terus nyusruk di tanah dengan keras.
