Di kerasnye kehidupan pinggiran Betawi, ada bocah tengil bernama Jambul yang mulutnye ceplas-ceplos tapi nyalinya kagak kalah sama jagoan gede. Bareng gurunye yang nyentrik, si Babeh Kribo, Jambul belajar silat, akal-akalan, sampe cara bertahan idup di dunia yang penuh tipu daya.
Dari satu masalah ke masalah lain, Jambul sering kejebak urusan sama rampok, buronan, sampe rahasia gelap yang ngumpet di balik hutan dan kampung. Tapi dengan gaya santai, tingkah kocak, dan kemampuan yang makin hari makin jadi, dia pelan-pelan ngebuktiin kalo dirinya bukan bocah sembarangan.
Penuh tawa, bahaya, dan ambisi, perjalanan si Jambul jadi kisah seru tentang keberanian, kecerdikan, dan mimpi besar… walau kadang dimulai cuma dari niat sederhana: nyari duit sama petualangan.
Karya ini diterbitkan atas izin NovelToon Bang Jigur, isi konten hanyalah pandangan pribadi pembuatnya, tidak mewakili NovelToon sendiri
Si jambul vs dua buronan
“Beh, kite sebenernye mau ke mana sih? Dari tadi muter-muter aje kayak kemidi puter. Perasaan nih area udah sepuluh kali kite lewatin. Kapan majunye, Beh?” tanya Jambul, mukanye penuh tanda tanya liat kelakuan babehnya.
Bukannye ape, si Babeh Kribo emang lagi ngetes kesabaran si Jambul. Jadi doi diem aje, kagak ngejawab. Matanye tetep fokus ke depan, sesekali ngelirik dalem hutan, kayak lagi nyari sesuatu yang kagak keliatan.
Cuman ya namanye bocah, dari pagi ampe siang diajak muter kayak gangsing tanpa arah, badan Jambul mulai loyo juga. Kakinye pegel, napasnye ngos-ngosan, mukanye udah asem kayak ketelen asem jawa.
“Aduh Beh… aus, Beh. Sumpah dah, nih tenggorokan rasanye kayak di Padang Sahara,” keluh Jambul, bocah sembilan tahun yang kepalanye plontos, tapi masih nyisain jambul dikit di deket jidat.
“So Sahara lu, Mbul. Kayak udah pernah ke sana aje,” jawab si Babeh Kribo santai, masih dengan gayanye yang nyebelin tapi kalem. “Kalo lu aus, noh samping kebon ada jamban.”
Seketika mata Jambul melotot, badan yang tadi lemes langsung tegang.
“Buset! Aye disuruh minum aer tai, Beh?! Tega bener dah, punya guru kagak ada akhlak!”
“Makannye jangan kebanyakan ngeluh. Jadi murid gua itu mesti kuat, paham? Baru juga setengah hari. Belom juga seminggu. Payah luh, Mbul,” ledek si Babeh sambil nyengir tipis.
“Ebuset… seminggu? Emang Babeh kuat?” tanya Jambul, matanye nyipit penuh rasa penasaran.
“Lah, jangan kan seminggu. Sehari aje Babeh dah modar,” kelakar si Babeh santai, enteng banget ngomongnye.
“Wuuhh, kirain kuat. Nggak taunye metong juga. Hahahah…” balas si Jambul sambil ngakak lepas, badan sampe agak bungkuk nahan tawa.
Belom juga tawanye reda, tiba-tiba dari dalem hutan kedengeran suara krasak-kresek, kayak ada yang gerak di antara batang pohon sama semak belukar. Suaranye pelan, tapi cukup bikin bulu kuduk berdiri.
“Heh… sssstt… tutup tuh congor lu, Mbul. Ngakak aje dah kayak burung beo,” bisik si Babeh, nadanye langsung berubah serius.
Seketika si Jambul langsung mingkem rapet. Tangannye refleks nutup mulut, matanye melotot, napasnye ditahan, takut suaranye malah narik perhatian sesuatu yang ada di dalem hutan.
Tiba-tiba si Babeh narik si Jambul ke balik sebuah batu gede buat ngumpet. Gerakannya cepet, tapi tetep halus, kayak udah biasa ngadepin keadaan begini.
“Heh dah… ngapain sih, Beh, pake ngumpet segala?” tanya Jambul pelan, masih bingung tapi nurut aja.
“Jangan berisik. Lu diem dulu. Lu liat deh, bentar lagi dari dalem hutan ada yang keluar,” jawab si Babeh lirih, matanye tetep mantengin arah suara.
Si Jambul langsung diem. Badannya nempel ke batu, matanye fokus ke kerimbunan hutan. Suara kresek-kresek makin kenceng, kayak ada yang lagi nerobos semak tanpa peduli suara.
Rasa penasarannya makin jadi. Napasnya ditahan, kupingnya dipasang, nungguin apa yang bakal nongol.
Nggak lama, dua orang tiba-tiba muncul dari dalem hutan. Dua-duanye masih muda, tapi tampangnye sangar. Tatapannya tajem, langkahnya mantap, masing-masing nyelipin golok di pinggang.
Begitu liat jelas, mata si Jambul langsung melebar. Dia ngenalin banget siapa mereka berdua.
“Wah… duit nih, Beh. Babeh tau aje…” bisiknya, sudut bibirnya naik, antara kaget sama girang.
“Siape? Coba tebak?” tanya si Babeh, matanye masih ngintip dari balik batu.
“Itu kan Mat Kodir sama temennye si Jalu. Yang jadi buronan kumpeni. Tukang rampok, tukang merkosa anak gadis orang. Masing-masing lima puluh gulden, Beh. Nyok kite tangkep!” ucap si Jambul semangat, matanye langsung berbinar.
“Gaya lu, Mbul, mau nangkep. Lu sanggup nangkep mereka berdua? Gih, tangkep sono,” suruh si Babeh santai, malah kayak nantangin.
“Lah kan bareng Babeh… hehe,” balas si Jambul cengengesan.
“Ogah gua bantu. Gua pengen liat lu yang nangkep mereka berdua. Gua nonton aje dari sini,” kata si Babeh enteng, tangan dilipet di dada.
“Oke, Beh. Tapi guldennye buat aye semua kalo gitu,” jawab si Jambul cepet, senyumnya makin lebar.
Plakkk!
Kepala si Jambul langsung kena keplak.
“Adaw! Dih, Babeh main keplak aje,” ucapnya sambil meringis, megangin kepala.
“Mau kualat lu sama guru? Dah, buru sono. Lumpuhin mereka berdua,” perintah si Babeh lagi, nadanye tegas.
“Iye, iye…” bales si Jambul sambil merungut, tapi kakinye udah mulai nyelonong keluar dari balik batu.
