Di kerasnye kehidupan pinggiran Betawi, ada bocah tengil bernama Jambul yang mulutnye ceplas-ceplos tapi nyalinya kagak kalah sama jagoan gede. Bareng gurunye yang nyentrik, si Babeh Kribo, Jambul belajar silat, akal-akalan, sampe cara bertahan idup di dunia yang penuh tipu daya.
Dari satu masalah ke masalah lain, Jambul sering kejebak urusan sama rampok, buronan, sampe rahasia gelap yang ngumpet di balik hutan dan kampung. Tapi dengan gaya santai, tingkah kocak, dan kemampuan yang makin hari makin jadi, dia pelan-pelan ngebuktiin kalo dirinya bukan bocah sembarangan.
Penuh tawa, bahaya, dan ambisi, perjalanan si Jambul jadi kisah seru tentang keberanian, kecerdikan, dan mimpi besar… walau kadang dimulai cuma dari niat sederhana: nyari duit sama petualangan.
Karya ini diterbitkan atas izin NovelToon Bang Jigur, isi konten hanyalah pandangan pribadi pembuatnya, tidak mewakili NovelToon sendiri
Si iwan gagal kawin
Suasana di markas Bang Jokan bener-bener makin sepet. Iwan balik dari Sawangan sambil nyeret kaki, mukanya ditekuk kayak cucian nggak disetrika. Harapannya buat dapet bantuan langsung dari Mat Gondrong pupus sudah, gara-gara si preman gimbal itu lagi ada "proyek" laen.
"Ngapain dia pake ngadep kumpeni? Kaga punya prinsip amat tuh orang, mentang-mentang dikasih gulden langsung nempel ke ketiak menir," gerutu Bang Jokan sambil ngisep rokok klobotnya dalem-dalem.
"Katanye sih Menir Van de Brenk lagi dibikin jengkel luar biasa sama Setan Kribo, Beh. Gara-gara tuh setan udah nyolong banda berharga punya kompeni. Terus denger-denger juga si Mat Kodir udah modar di lobang jamban, dikalahin sama muridnye Setan Kribo yang palanye botak licin ntu," jelas si Iwan sambil duduk selonjoran di balai-balai.
Bang Jokan manggut-manggut, matanya nyipit denger nama rival lamanya disebut. "Setan Kribo... tuh orang emang jadi momok buat perampok. Tapi sayangnye dia juga pro kompeni. Ya udah mau gimane lagi? Kita tunggu aje sampe si Mat Gondrong dikasih tahu anak buahnye soal urusan kita."
Iwan diem bentar, terus masang muka melas yang paling pol, matanya ampe berkaca-kaca kayak minta jajan. "Tapi soal Ipeh gimane, Beh? Masa dibiarin aje dibawa kabur si botak?"
Mendengar nama Ipeh, emosi Bang Jokan yang tadinya udah agak adem langsung meledak lagi. Dia inget kejadian horor di hutan tadi sore.
"Ah, tai lo! Lo kagak tau apa babeh lo ini hampir mampus dikejar-kejar sama setan penghuni hutan Condet?! Gua udah nyari-nyari dari pagi ampe malem, bukannye nemu jejak Ipeh, malah hampir modar dicaplok Kuyang! Lo mau ngerasain?! Sono cari sendiri kalo berani!" semprot Bang Jokan galak.
Iwan langsung ciut, badannya gemeteran ngebayangin muka Kuyang. "Yah, Babeh... gagal kawin dong aye sama Ipeh? Kalo kelamaan, entar keburu diambil si botak, Beh..." keluh Iwan sambil merengut, bibirnya manyun-manyun kayak mau mewek.
Bang Jokan ngeliatin anaknya yang manja itu sambil geleng-geleng kepala, rasa gedeknya udah nyampe ke ubun-ubun.
"Lo kudu sabar, Wan! Urusan nyawa ini mah, bukan urusan maen jenglot! Kalo lo emang udah kagak sabaran bener penegen kawin..." Bang Jokan diem bentar, terus nunjuk ke arah belakang rumah dengan jempolnya. "...lo bedakin aje noh kambing di kandang, terus lu kawinin dah! Kagak bakal nolak dia mah!"
"Babeh mah... masa aye disuruh sama kambing," gumam Iwan makin mewek, sementara anak buah Jokan yang laen cuma bisa nahan tawa sambil nunduk dalem-dalem, nggak berani ikut campur urusan bapak-anak yang lagi stres gara-gara "Hutan Keramat".
Balik ke goa babeh...
Pagi harinya di goa, suasana langsung panas. Si Babeh nggak kasih ampun. Habis kejadian "ngusir" Bang Jokan semalam, dia makin sadar kalau waktu makin mepet. Begitu matahari nongol dikit, Jambul sama Ipeh sudah disuruh berdiri di depan goa.
“Udah cukup main-mainnye! Sekarang kite masuk ke tahap yang bener-bener bikin badan lu berdua rontok!” bentak Babeh sambil nenteng rotan kecil.
Babeh berdiri di depan Ipeh. Dia ngeluarin pedang kayu panjang yang lentur banget.
“Peh, Wushu itu seninya gerak. Kalo lu kaku, lu mati. Lu harus kayak aer yang ngalir tapi punya ujung yang tajem kayak silet!”
Babeh mulai nunjukin gerakan dasar Wushu (Changquan) yang digabung sama dasar Kungfu Pat-Kua. Ipeh disuruh ngelakuin gerakan melompat sambil muterin pedangnya. Sing-sing-sing!
“Lompat! Puter badannye! Jangan kayak nangka jatoh!” teriak Babeh.
Ipeh bener-bener digembleng. Dia disuruh lari di sela-sela pohon bambu sambil nebas daun-daun yang jatoh ketiup angin. Nggak boleh ada satu daun pun yang mendarat di tanah sebelum kepotong jadi dua. Ipeh keringetan parah, rambutnya yang tadinya rapi jadi acak-acakan, tapi gerakannya makin indah. Badannya makin lentur, tiap kali dia muter, pedangnya kayak ngebentuk perisai perak di sekeliling badannya.
Di sisi lain, Jambul dapet porsi yang lebih sangar. Babeh nyuruh Jambul berdiri di bawah air terjun kecil samping goa. Di tangannya ada golok jawara yang berat bener.
“Mbul! Lu udah punya tenaga Godam Beksi. Sekarang lu pake tenaga itu buat ngerobek angin! Namanye jurus Golok Seribu,” perintah Babeh.
“Maksudnye gimana, Beh? Seribu golok aye bawa?” tanya Jambul bego.
Plak! Rotan Babeh mendarat di paha Jambul.
“Bego dipelihara! Maksudnye, tebasan lu harus secepet kilat sampe keliatan kayak ada seribu golok yang nyerang barengan! Lu liat air terjun itu? Potong airnye sampe lu bisa liat celah di tengahnye!”
Jambul nelen ludah. Dia mulai ngayunin goloknya. Wush! Brak! Awalnya cuma cipratan air yang kena mukanya sendiri. Tapi Jambul nggak nyerah. Dia kumpulin tenaga dalem di lengan kanannya. Urat-urat tangannya nongol kayak akar pohon.
Setiap kali dia nebas, dia teriak, “Modar lo aer sialan"
Lama-lama, sabetan Jambul makin edan. Suara goloknya yang ngebelah angin kedengeran kayak suara petir di siang bolong. Satu sabetan, dua sabetan, sampe akhirnya gerakannya jadi makin cepet. Kalo orang biasa yang liat, mereka cuma bakal liat kilatan perak yang nutupin badan Jambul.
keesokan harinye
Sekarang... kite tes! Percuma lu latihan sampe mencret kalo kagak tau cara makenye buat nyerang sesame manusia!” teriak Babeh. “Mbul! Serang Ipeh pake Golok Seribu lu! Peh! Pake langkah Pat-Kua sama Wushu lu buat nyari celah!”
Jambul narik napas dalem. Dia liat Ipeh, terus dia angkat golok jawaranya. “Maafin abang ya, Peh... abang nggak bakal nahan tenaga nih!”
“Sikat aja, Bang! Aye udah siap!” tantang Ipeh, pedang tipisnya bergetar di tangan, ujungnya ngeluarin suara nging yang halus banget.
Jambul melesat duluan. Gerakannya nggak seberat dulu. Begitu dia ngayunin golok, bener aja, kilatan perak kayak muncul dari segala arah. Wush! Wush! Wush! Angin tebasannya bikin daun-daun kering di tanah terbang berputar.
Ipeh nggak panik. Dia inget filosofi bapaknya: Melingkar.
Begitu golok Jambul nyaris kena pundaknya, Ipeh muter badannya halus banget. Pedang tipisnya nggak dipake buat adu otot, tapi cuma buat nempel di punggung golok Jambul, digeser, terus dibuang ke samping.
Tring! Sreeet!
Jambul kaget. Tenaganya yang segede gajah kayak ilang ditelen bumi pas kena pedang Ipeh. Dia muter badan lagi, nembak sabetan lurus ke arah kaki.
Ipeh melompat tinggi. Di udara, dia ngelakuin salto—gerakan khas Wushu yang udah dilatih berbulan-bulan. Sambil melayang, pedangnya mematuk cepat kayak lidah ular ke arah dada Jambul.
“Eitss!” Jambul nangkis pake gagang goloknya. Takk!
Benturan itu ngeluarin percikan api. Jambul mundur tiga tindak, kakinya napak kuat ke tanah sampe tanahnya ampe ambles dikit. Dia nyengir. “Gila lu, Peh! Hampir aja baju abang robek!”
“Langkah kaki abang juga makin padet! Aye susah nyari celah di bawah!” bales Ipeh, matanya makin tajem, konsentrasinya penuh.
Babeh yang ngeliat dari pinggir lapangan mulai gatel tangannya. Dia mungut dua batang kayu bakar yang masih nyala dikit apinya.
“Dah, segitu doang?! Nih, rasain lawan Babeh!”
Tanpa aba-aba, Babeh melesat masuk ke tengah duel. Dia nyerang Jambul sama Ipeh barengan. Kayu bakarnya gerak secepet kilat, satu nyerang leher Jambul, satu lagi nyerang pinggang Ipeh.
Prak! Takk! Sing!
Jambul sama Ipeh refleks kerjasama. Jambul pasang badan jadi tameng pake goloknya buat ngelindungi Ipeh, sementara Ipeh nyelip dari ketiak Jambul buat nebas kayu bakar di tangan Babeh.
“Bagus! Begitu! Musuh lu nanti banyak, jangan maen sendiri-sendiri!” Babeh makin kenceng nyerangnya.
Duar! Jambul pake tenaga Godam-nya buat mukul tanah. Tanah muncrat ke atas jadi tabir debu. Di balik debu itu, Ipeh melesat kayak bayangan putih, pedangnya lurus ke arah dada Babeh.
Babeh cuma geser sesenti, tapi ujung pedang Ipeh berhasil motong sehelai rambut kribo Babeh.
Babeh berhenti gerak. Dia megang kepalanya, terus liat sehelai rambutnya jatoh ke tanah. Jambul sama Ipeh berdiri ngos-ngosan, baju mereka basah kuyup, tapi muka mereka puas banget.
“Beh... maaf, Beh... rambut Babeh kepotong,” ucap Ipeh takut-takut.
Babeh diem bentar, terus tiba-tiba ketawa ngakak sampe perutnya yang buncit itu goyang-goyang.
“Hahahaha! Mantep! Gila lu pada! Seumur-umur baru kali ini ada yang bisa motong rambut gua!” Babeh nepuk-nepuk pundak Jambul sama Ipeh kenceng banget. “Lu berdua udah lulus. Lu udah punya taring.”
