Di kerasnye kehidupan pinggiran Betawi, ada bocah tengil bernama Jambul yang mulutnye ceplas-ceplos tapi nyalinya kagak kalah sama jagoan gede. Bareng gurunye yang nyentrik, si Babeh Kribo, Jambul belajar silat, akal-akalan, sampe cara bertahan idup di dunia yang penuh tipu daya.
Dari satu masalah ke masalah lain, Jambul sering kejebak urusan sama rampok, buronan, sampe rahasia gelap yang ngumpet di balik hutan dan kampung. Tapi dengan gaya santai, tingkah kocak, dan kemampuan yang makin hari makin jadi, dia pelan-pelan ngebuktiin kalo dirinya bukan bocah sembarangan.
Penuh tawa, bahaya, dan ambisi, perjalanan si Jambul jadi kisah seru tentang keberanian, kecerdikan, dan mimpi besar… walau kadang dimulai cuma dari niat sederhana: nyari duit sama petualangan.
Karya ini diterbitkan atas izin NovelToon Bang Jigur, isi konten hanyalah pandangan pribadi pembuatnya, tidak mewakili NovelToon sendiri
Cornelis Chalestein
Sementara itu, jauh ninggalin rimbunnye hutan Condet, tepatnye di daerah Srengseng Sawah, berdiri satu Landhuis—rumah singgah gede bener bergaya Londo. Itu rumah emang biase dipake Tuan Cornelius buat ngetem sambil mantau kebonnye yang luasnye kaga kira-kira.
Pas bener matahari baru mau naik, Tuan Cornelius baru aje nyampe. Dokarnye brenti pas di depan pelataran, debu jalanan ngebul tipis kena roda kayunye. Eh, di depan pintu gerbang kayu yang tinggi, jebulnye Menir Van de Brenk udah nungguin sambil berdiri kaku. Mukenye pucet bener kayak mayat dikasih bedak, soalnye dia emang dipanggil paksa sama Tuan Cornelius.
Tuan Cornelius lagi gedek bener. Dia kaga abis pikir, nape si Jalu yang udah susah-susah dia bikin jadi buronan lewat sebaran kertas di seantero Batavia, eh pas udah ketangkep malah dilepasin gitu aje sama si Van de Brenk.
Begitu Tuan Cornelius turun dari dokar sambil nenteng tongkatnye, Van de Brenk langsung nunduk hormat sampe pinggangnye mau patah.
"Goedemorgen, Meneer Cornelius," ucap Van de Brenk, suaranye gemeteran kayak orang lagi meriang.
Tuan Cornelius cuma ngelirik tajem dari balik kacamatanye. Auranye dingin bener, bikin nyali siapa aje ciut.
"Morgen, Van de Brenk," sahut Tuan Cornelius pendek.
Dia jalan nyelonong masuk ke teras rumah, sementara Van de Brenk ngekor di belakangnye kayak anak ayam kehilangan babon. Pas udah duduk di kursi jati yang empuk, Tuan Cornelius langsung nembak pake pertanyaan pedes.
"Duduk!" perintah Tuan Cornelius pake bahasa Melayu yang kaku. "Sekarang jelasin ke saya, kenapa itu buronan kau lepaskan? kau tahu berapa banyak kertas buronan yang sudah saya sebar cuma buat menangkap si Jalu?"
"Begini Tuan... sebenernye si Jalu mah kaga bersalah. Justru dia ntu jadi korban kebejatan Setan Kribo! Mat Kodir juga modar gara-gara tuh setan! Namanye juga setan Tuan, kerjaannye ngerampok ama perkosa cewe orang. Nah, si Jalu ama Mat Kodir kan orang beduit, bininye juga cakep-cakep, dirampok dah tuh semua ama si Setan Kribo. Jadi seharusnye yang jadi buronan ntu die Tuan, bukan si Jalu!"
Denger bacotan Van de Brenk yang muter-muterin fakta, Tuan Cornelis langsung berang. Mukanye merah padam, tangannye nggenggam gagang kursi kenceng bener.
"Hey Van de Brenk! Kau mau nipu saya, hah?! Justru Setan Kribo yang sering nangkepin penjahat. Kau jangan sembarangan fitnah orang!"
Van de Brenk bukannye ciut, malah makin berani pasang muke tembok. Dia ngerasa punya bekingan kuat.
"Tuan Cornelis... saya di sini dipercaya langsung ama Gubernur VOC di Batavia buat ngurusin keamanan di Depok ini. Segala seluk-beluk kejahatan, saya yang lebih tahu! Walau jabatan saya di bawah administrasi Tuan, tapi soal keamanan, tanggung jawab saya langsung ke Gubernur di Batavia. Jadi saya kaga bise sembarangan, Tuan. Kalo Tuan maksa pake opini Tuan sendiri, saya bise laporin ini ke Gubernur langsung!"
Inilah yang bikin jengkel Tuan Cornelis sampe ke ulu hati. Bukannye ape-ape, semenjak Gubernur VOC nempatin Van de Brenk di situ, banyak urusan keamanan di Depok jadi kaga bise dikuasai langsung ama Tuan Cornelis. Die sebenernye udah tahu kebejatan si Van de Brenk yang demen maen belakang, cuma die lagi kaga bise ape-ape. Biar begimana juga, die kudu tunduk ama aturan Gubernur VOC di Batavia.
Tuan Cornelis narik napas dalem-dalem, matanye tajem natap Van de Brenk seolah mau nembus jantungnye.
"Hmmh... suatu saat aku akan nyelidikin masalah ini secara langsung, Van de Brenk. Kalo sampe aku dapet bukti-bukti lu bersengkongkol ama penjahat..." Tuan Cornelis ngomong pelan tapi tajem, terus lanjutin pake bahasa Londo yang bikin Van de Brenk keringet dingin:
"Ik zal je direct rapporteren aan de VOC-top in Nederland!" (saya akan laporkan kau langsung ke petinggi VOC di Belanda!)
Van de Brenk cuma bise nunduk dikit, nyengir kecut sambil nahan dongkol di dalem ati. Dia tau, urusannye bakal makin runyam kalo Tuan Cornelis udah bawa-bawa petinggi di Negeri Kincir Angin ntu.
Kaga lama abis ntu, Tuan Cornelis mutusin buat balik ke rumahnye di Depok. Pas lagi enak-enakan naek delman, dia mulai buka omongan ama orang kepercayaannye yang duduk di samping. Namanye Bang Rojali.
Bang Rojali ini emang udah lama nempel ama Tuan Cornelis, udah kayak tangan kanannye dah. Bukan sembarang orang, die punya elmu silat yang kaga bise dipandang sebelah mata, ibarat kata mah setara ama si Babeh Kribo. Segala urusan kebon ampe keamanan sering dikasih ke tangan die. Termasuk laporan soal Van de Brenk yang demen maen belakang ampe urusan si Jalu yang dilepasin, itu semua hasil penyelidikan Bang Rojali yang diem-diem ngebuntutin.
Tuan Cornelis nengok ke arah Bang Rojali, mukanye serius bener.
"Van de Brenk semakin hari semakin menjengkelkan, Rojali. Saya mau kau cari Setan Kribo dan muridnya itu. Saya merasakan Van de Brenk akan memburu setan itu. Kau harus bantu dia, dia harus selamat. Setelah itu, bawa dia ke rumahku. Paham?"
"Baik Tuan. Saya paham," jawab Bang Rojali singkat sambil nundukin palanye dikit.
Kaga pake lama, Bang Rojali langsung loncat turun dari delman pas lagi jalan. Begitu kakinya napak tanah, die langsung melesat ilang di balik rimbunnye pepohonan, mau nyari keterangan di mane rimbanye si Setan Kribo berada.
